Happy Birthday, Carlo!

maaga akong nagising ngayon. kahit pilit pang nang iimbita ang malamig na panahon para muli kong akapin ang unan ko, pinilit ko naring tumayo at bumangon. kagaya ng nakagawian, gising na si mama. naunahan nanaman nya ako. siguro nga dahil pareho kaming excited sa araw na ito.

nag padeliver ako ng balloons. meron din kaming cake. tapos nag luto kami ng pansit, chicken, spaghetti, tapos may ice cream, bico, hotdogs sa stick at barbeque. may buco pandan den. yum!

9th birthday kasi ng pamangkin kong si Caloy. John Carlo ang buo nyang pangalan. maputi, medyo makapal ang kanyang wavy na buhok, chubby, matangkad, maliksi, madaldal, matalino, lahat na. all in one...

sa kanya ako unang natuto magpalit ng lampin, maghugas ng puwit ng sanggol, magpalit ng damit, magtimpla ng dede, mag paligo ng baby, yun, sya ang naging praktisan ko pagdating sa bata. nag aagawan na nga kami ng nanay ko na lola nya syempre, iba kasi ang may bata sa bahay. parang shabu, nakakaadik alagaan. minsan pag tulog, gusto ko gisingin, pag gising naman, ang sarap patulugin. nahihilo na nga siguro yun. at kung pwede sigurong magreklamo yung bata, aba sasabihin nun na itigil muna ang pagpapadede ko at baka siya maempatcho.

giyera talaga ang eksena kapag pinagalitan na siya ng nanay at tatay nya. naku walang pwedeng maka kurot sa kanya kundi ako at si mama. tito at lola ang kalaban ng nanay at tatay nya sa tuwing makulit sya at pagagalitan. kung sa ibang bata, hindi pwedeng tumakbo, magulo, mag ingay at makelam ng mga kagamitan, umiyak at mangulit, si Carlo hindi. siyempre, spoiled siya pag dating saamin.

masayang masaya siguro yun.
matutuwa, at magagalak.

maeexcite yun kapag nakita nya na sa loob ng siyam na taon, lahat ng regalo nya tuwing kaarawan at pasko, nakabalot pa.

masisiyahan yun kapag nakita nya yung mga dating laruan at gamit nya, maayos at nakatabi pa.

kung sana andito siya.
kung sana Buhay pa siya.

Happy Birthday Caloy!

John Carlo A. Empeño
September 07, 1999-May 14, 2000